صباحي اؤدولو

sabahi.odulu@gmail.com

بو ایل ده سیزین امکداشلیغینزلا صباحی اؤیکو اؤدولونون مسابقه‌سینی کئچیرده بیلدیک. مرداد آیی‌نین 11-جی گونونده یاییملادیغیمیز بیلدیریش اساسیندا، صباحی اؤیکو اؤدولون ایکینجی ایلی رسمی اولاراق باشلادی؛ عزیز یازارلاریمیز مهر آیی‌نین 7-جی گونونه قدر (اثر گؤندرمه‌نین سون مؤهلتینه قدر) بیزه اؤز اثرلرینی یوللاییب مسابقه‌یه قاتیلدیلار. الیمیزه چاتان حئکایه‌لرین سایی بیلدیره گؤره 12 عدد آرتیب 62 یه یوکسلدی. سونرا بو 62 حئکایه  دیرلندیرمک اوچون داورلره تاپشیریلدی؛ اونلار دا حئکایه‌لرین هامیسینی اوخویوب نهایتده 12 حئکایه‌نی سئچیب ایکینجی مرحله‌یه کئچمه‌یه لاییق گؤردولر و بو مرحله‌ده بو 12 حئکایه اوزه‌رینده مذاکیره‌لر آپاریب 4 حئکایه‌نی (بیرلیکده) ایکینجی صباحی اؤیکو اؤدولونون قازانان‌لاری تعیین ائتدیلر. علاوه ائتمه‌لی‌ییک کی داورلرین نظری اساسیندا 2 حئکایه ده تقدیره لاییق گؤروندو.

قازانان یازارلار و حئکایه‌لری‌نین آدلاری بو صورتده اعلان اولونور: (الیفبا سیراسی ایله)

پری آخته، (اردبیل)، حئکایه‌نین آدی: "هله ده کی وار بو دووار سو وئریر"

سعیده احمدی، ( جولفا)، حئکایه‌نین آدی: "گؤزلوک بیرینه بیر بئله یاراشارمی؟"

یعقوب رنجبر، (مشکین شهر)، حئکایه‌نین آدی: "بال آری‌سی حئیواندی!"

سمیه علیدوست، (اورمو)، حئکایه‌نی آدی: "اوزاق‌لاردا یاخین"

داورلرین تشخیصی اساسیندا ایکی عزیز یازاریمیز دا تقدیره لایق گؤروندولر: خانیم فاطمه میرحسن‌پور یازدیغی "ساری کفن" حئکایه‌سی اوچون و خانیم عظیمه کریم‌زاده یازدیغی "آخی ایبراهیم تاپشیرمیشدی" حئکایه‌سی اوچون. قالان ایکینجی مرحله‌یه کئچن حئکایه‌لر ده بونلاردان عیبارتدی: * موبارات (ووقار نعمت) * سون مئساژ (سمانه حبیبی مقدم) * کؤرپو یئددی گؤزله منه باخیر (پریسا میرزایی ماهر) * سولماز (مسعود سبزی) * غریبه دیل-داماقلی گون‌لریمیز واریدی (سوسن نواده رضی) * ساده بیر شئی (مجید راستی)

صباحی اؤدولونون اجرایی هئیتی اولاراق قازانان یازارلارا و هابئله تقدیره لاییق گؤرونن‌لره ده باشاریلار دیله‌ییب و  بیزه مختلف یول‌لارلا یاردیم ائدن بوتون دوست‌لاردان، اؤزللیکله مسابقه‌میزین بیلدیریشینی اؤز وئبلاق‌لاریندا و سیته‌لرینده یایان‌لاردان، مسابقه‌یه قاتیلان‌لاردان و دیرلی داورلریمیزدن تشککور ائدیب هامیسینا جان ساغلیغی آرزیلاییریق. ادبییاتیمیزین اوغورلو گله‌جه‌یینه ایناناراق اومود ائدیریک کی گلن ایل‌لرده ده یانیمیزدا اولوب یاریشمانین داها گوجلو کئچیریلمه‌سینه یاردیمجی اولاسینیز.

صیاحی اؤدولونون اجرایی هئیتی- 30 آبان 1393

+   جمعه 1393/08/30ساعت 22:38     | 

دوست‌لاريميزين بير سيراسي "نه‌دن بيلديره تاي بيرينجي مرحله‌نين ايلك اون حئكايه‌سيني اعلان ائتميريز؟" دئيه، بيزدن سورغو-سوال ائديرلر. صباحي اؤيكو اؤدولونون اجرايي هئيتي اولاراق بو حاقدا بير سيرا ايضاح‌لاري وئرمه‌لي‌ييك:

بو ايلده‌كي ياريشماميزدا داورلر ايلك اؤنجه بوتون حئكايه‌لري اوخويوب بيَنديك‌لري حئكايه‌لري سئچمه‎لي ايديلر. (بو سئچيلميش حئكايه‌لرين ساييني معين‌لنديرمه‌ميشديك و هر داور اؤز سليقه‌سي اساسيندا هر نئچه حئكايه‌ني سئچه بيلردي. آنجاق اؤنرديييميز ساي 10 ايدي.). بو مرحله بيتيب و حال حاضيردا داورلريمز بيرينجيني سئچمك اوچون اؤز آرالاريندا مذاكره‌ده ديرلر و گلن گونلرده (آذرين 1-جي گونونده) اورتاق بير نظره چاتيب بيرينجي يئري قازاناني (يا قازانان‌لاري) معين ائده‌جك‌لر. بو سونوج بو وئبلاگدا سيزلر اوچون اعلان ائديله‌جك.

سيزه اوغورلار

+   چهارشنبه 1393/08/28ساعت 12:38     | 

بیلدیگینیز کیمی صباحی حئکایه اؤدولونون اثر گؤندرمه مؤهلتی ایکی گون اؤنجه بیتدی و سونوندا مسابقه‌یه قاتیلان‌لارین سایی بیلیندی. سیز عزیز یازارلار بیزیم چاغیریشیمیزی جاوابسیز قویماییب و بو ایل ده  ده‌یرلی اثرلرینیزی مسابقه‌یه یوللادینیز.مردادین 15-جی گونوندن مهر آی‌نین 7-جی گونونه قدر الیمیزه چاتان اثرلرین سایی نهایت 61 دنه اولدو. بوتون ادبیاتچی‌لاریمیزدان، مسابقه‌نین داها دا گؤزل کئچیریلمه‌سینه یاردیمجی اولان‌لاردان، اؤزللیکله بو 61 یازاریمیزدان تشککورلریمیزی بیلدیریریب اونلارین آدلارینی بو شکیلده آچیقلاییریق:

 

1

پریسا میرزائی ماهر

2

حسین ساعدی

3

مسعود سبزی

4

سعید خسروشاه

5

حامد صالح زاده

6

احمد خضرلو

7

حسین فیض الهی وحید

8

علی اکبر دهقانی

9

پرویز فیروهر

10

حامد مرسلی

11

ائلناز محمدپور

12

سحر مرشد

13

مصطفی جباری سابق

14

فرانک انصاری

15

علیرضا قاسمی

16

سعیده احمدی

17

حسین واحدی

18

رضا مظفری

19

سمیه علی دوست یولقونلو

20

راضیه افتخاری

21

لیلا محمدعلی زاده نیکو

22

علی اصغر اوجاقلو

23

نازخند صبحی

24

علی فرهاد

25

توران قربانی صادق

26

بهمن قنبری

27

میر هدایت سید مرندی

28

رقیه وعیدی

29

امید حضرتی

30

ووقار نعمت

31

یحیی آلیلو

32

مجید راستی

33

سجاد مسلمی

34

فرخنده امیری

35

پری آخته

36

سید میلاد نصیری

37

کیوان قربانی

38

مجتبی آقاپور

39

صدرا آقاسی

40

نادر پاشائی

41

ویدا صالحی

42

فاطمه میرحسن پور

43

مصطفی جمشیدی

44

محمد سرافراز ملکی

45

شیوا محمدی

46

احمد محمدی

47

سوسن نواده رضی

48

یاسر ارتشی

49

فهیمه مصطفی پور

50

حمید اسدی

51

رضا جنتی

52

مهسا عبدالعلی زاده

53

ایقار موذن زاده

54

سمانه حبیبی مقدم

55

عظیمه کریم زاده

56

مجتبی حسنی زنگینی

57

نسرین شیر محمد زاده

58

حکیمه رسولی

59

یعقوب رنجبر

60

بهاره نهادی

61

سیدرضا حسینی

62

حسن دولتیاری

+   چهارشنبه 1393/07/09ساعت 22:32     | 

عزيز يازارلار، حؤرمتلي دوست‌لار!

 "صباحي اؤيكو اؤدولونون اثر گؤندرمه مؤهلتي بيتدي. گؤزل اثرلرينيز گليب اليميزه چاتدي. تئزليكله بيزه اثر گؤنده‌رن‌لرين آدلاري ائله بو صفحه‌ده درج اولوناجاقدير.  دَيَرلنديرمك اوچون بو اثرلري حؤرمتلي  داورلره گؤنده‌ريب و وعده وئرديييميز گونده ده سونوج‌لاري اعلان ائده‌جه‌ييك. (1 آذر) بيزه يارديم ائدن دوست‌لاردان، اؤزلليكله ياريشمايا قاتيلان عزيزلردن تشككوروموزو بيلديريب هامينيزا اوغورلار آرزيلاييريق. 

صباحي اؤيكو اؤدولونون اجرايي هئيتي

+   سه شنبه 1393/07/08ساعت 8:3     | 

"صباحي" ايلليك حئكايه اؤدولو(ايكينجي ايل-1393)

SABAHI SHORT STORY AWARD :2014

 

اؤدول: بير ميليون تومن (بيرينجي سيرادا يئرله‌شن حئكايه يا حئكايه‌لر اوچون)

- اثرلرين گؤندرمه مؤهلتي:  31 شهريور 1393

- ياريشمانين سونوجو اعلان ائديلن گون:  1 آذر 1393

- اثرلر آذربايجان توركجه‌سينده و عرب اليفباسيندا يازيلمالي دير.

- هر يازيچي بير اثر گؤندره بيلر.

- اثرلرين ايندي‌يه‌دك باشقا يئرده (كيتاب، درگي، سايت) چاپ اولونماماسي گركلي دير.

- حيكايه لر word دا تايپ اولونوب بو آدرسه گؤندر مه لي دير:  sabahi.odulu@gmail.com

- اثرله بيرليكده اؤزونوزدن بير قيسا بيوگرافي گؤندرين.(شكيلينيز، تيلفون نومره نيز اونوتولماسين)

 

صباحي اؤدولو ياريشماسي نين اجرايي هيئتي

 

+   شنبه 1393/05/11ساعت 11:37     | 

 

اورهان پاموكون «بياض قالا» روماني آذربايجان توركجه سينده تبريزده «نباتي» نشرياتي طرفيندن ياييلدي. كتابي خانم رباب آذربايجان توركجه سينه چئويريب.
بو رومانين ايكي اساس قهرمانلاري: 1.عثمانلي لارا اسير دوشموش بير بيزانسلي و 2.عثمانلي درباري نين عالمي ديلر.
«بياض قالا» رومانيندا بيزيم اؤيرشديگيميز سنّتي شرق-غرب مسأله‌سي بعضي مقاملاردا اويونا چئوريلير. و يازار اونو ادعا ائتمگه چاليشير كي، بؤيوك انسان اوچون بو توققوشما‌لار يوخدور. شرق-غرب دَيري يوخدور، ساده‌جه دَير وار و بؤيوك انسان يالنيز اؤز دنياسيني دوشونوب آدديم آتير. شرق و غرب مدنيتي بير-بيري‌نين ايچينده اريمه‌ديگيندن بو بئله اولور. اثرده كؤله و آغا مناسبتي وار. بو ايكي آيري-آيري مدنيتين مناسبتي كيمي تظاهر اولونور. آما مناسبت فرقلي و ياد مناسبتدير. كؤله آغا‌سيز ضعيفدير. آغا دا كؤله‌سيز.
كتاب رقعي قطعده 156 صفحه ده و 7000 تومن قيمتله حاضرلانيب.

ياييم مركزلري:
1. تبريز. شهريار تجارت مركزي. نباتي نشرياتي (تهراندا اولان 10-20 گونلرينده، كتاب سرگيسينده ده اولاجاق)
2. تبريز. گولوستان باغي فرهنگي علمي دائمي كتاب سرگيسي. غرفه 22 
 
قايناق:دين خاديمي
+   شنبه 1393/03/03ساعت 13:2     | 

حئكايه نئجه يازيلماليدير:

 هر كسين استفاده ائده بيله‌جه‌يي يئددي اصول

چاك سامبوچينو

چئويرن: ائلجان سالمان قيزي

كؤچورن: ابوذر جعفري

 

1- ان چوخ اوخوماق ايسته‌دييينيز حئكايه‌ني يازين. اصلا سيزه فخر گتيره‌جه‌يي قناعتينده اولدوغونوز بير حئكايه‌ني قلمه آلمايين. اؤز سئويملي كيتاب‌لارينيزي، اونوتماديغينيز حئكايه‌لري دوشونون. اونلاري دوشونون دئمك او دئمك دئييل كي، سيز اونلاردان يولا چيخيب تاريخي و رومانتيك بير ادبي نمونه ياراتماليسينيز. اولا بيلر كي، سئويملي اثر و يا حئكايه سئوديينيز ژانردا اولماسين، آمما سيز اوردا خصوصي بير صورته، كاراكتئره، هانسيسا بير حادثه‌يه، حادثه‌لرين بيتمه‌سينه وورولموسونوز. اودور كي، سئودييينيز شئي‌لردن يازين. بير ياخشيليق ائدين- بوتون شيدّتلي آرزولارينيزي، اوره‌يينيزين ريتمي‌ني سورعتلنديرن، سيزي گئجه ياريسي يوخودان اويادان چيلغين ايده‌لرينيزين ليستيني توتون. هر گون يازديق‌لارينيزا قيغيلجيم اولماسي اوچون بو ليستي ماسانيزين اوستونده گؤز اؤنونده ساخلايين و اوندان بلدچي كيمي يارارلانين.

 

2- صورتله باشلايين. ياراتديغينيز كاركتئرلرين قصورلو و اينانديريجي اولماسينا چاليشين. اونا نفس و حيات وئرين، سيزي تعجب‌لنديرمه‌سي و حئكايه‌نيزي هئچ گؤزله‌مه‌دييينيز اينانيلماز يئرلره آپارا بيلمه‌سي اوچون اونا آزادليق وئرين. اگر حئكايه‌نيزين قهرماني سيزي تعجبلنديره بيلميرسه، امين اولون كي، او اوخوجولارينيز اوچون ده سيرادان گؤرسه‌نه‌جك. اؤزومون چوخ تئز-تئز ائتديييم بير اوصولو مصلحت بيليرم، من ياراتديغيم كاراكتئرين سيرلر، گيزلي شئي‌لر دانيشماسيني طلب ائديرم. قلمينيزي گؤتورون و آغ بير ورقده «من هئچ واخت هئچ كيمه دئمه‌ميشم كي...» جومله‌سي ايله باشلايين و بوردان يولا چيخين، كاراكتئرينيزين سسيني ائشيتمه‌يه چاليشين.

 

3- قهرمانينيزا حل ائيديله‌جك ماراقلي، جلب ائديجي بير سورون (مساله) وئرين. قهرمانينيزين اذيت وئرن، اونون آرادان قالديرماغا چاليشاجاغي، اونو ايره‌لي‌له‌ده‌جك مساله‌لري اولماليدير. هر حئكايه‌نين اوره‌يي كونفليكت‌دير- داخلي و يا خارجي اولماسي‌نين فرقي يوخدور، ياخشي بير كونفليكت ياراتماغا چاليشين. اونوتمايين كي، بو كونفليكت، مساله سيزين قهرمانينيزي دا جيزگيله‌يير، سرحدلريني تعيين ائدير، اونو فورمالاشديرير.


4- حادثه‌لر يارادين. اولا بيلر كي، دونيادا ياراديلا بيله‌جك ان مؤحتشم قهرمان‌لاري يارادير، اونلاري مكمل شكيلده تصوير ائدير، حيات وئريرسينيز، آمما نتيجه گؤزله‌دييينيز كيمي اولمور، حئكايه اونا وئردييينيز اوزو تئزليكله ايتيرير. كيتابلاريمدا من بير شئي‌دن آدديم‌باشي امين اولماغا چاليشيرام، هر صحنه‌ده باش وئرن حادثه سوژئته يئني بير آيرينتي قازانديرير. اگر گؤرورَمسه، ياراتديغيم صحنه سوژئتين جانلي داوام‌ليليغيني تامين ائده بيلمير و اونون ايره‌لي‌له‌مه‌سينه كمك ائتمير، همين صحنه‌ني كسيرم، نه قدر تاثيرلي و گوجلو اولورسا-اولسون. رئداكته ائدركن ده من صحنه-صحنه ايره‌لي‌له‌ييرم و هر صحنه اوچون بير سؤز جومله قئيد ائديرم. رئداكته بيتن‌ده منيم اليمده حئكايه‌مين اسكلتي قالير. نتيجه و پروسئس سيزه  آسانليقلا نئجه بير حئكايه يازديغينيزي دئيه بيلر، هجوم‌لر و غفيل دؤنوش‌لر، حادثه‌لري ايره‌لي سوروكلنمه‌ين صحنه‌لر ساده‌جه اؤز چكيسيني يوخ، اثرين ده چكيسيني آزالدير.

 

5- اينانديريجي اولماسيني تامين ائدين. بلي، دئيه بيلرسينيز كي، آخي، چوخ زامان روح‌لار، افسانه‌لرده بزكلي حئكايه‌لر يازيرسينيز، بو نئجه اينانديريجي اولا بيلر؟ اولا بيلر، اگر بو شرطي بوتون كيتاب اوچون تامين ائده بيلسه‌نيز. «سؤز وئريرم»ده من روح اوچون قايدالارلا باشلاديم، او نه‌لري ائده بيلر، نه‌لري ائده بيلمز. اونا بير حئكايه و منه گئري دؤنمه‌سي اوچون سبب وئرديم. اوخوجولار اوجوز اويون‌لارا نفرت ائدير. حئكايه‌نين سونونا سورون‌لارين چؤزولمه‌سينه كمك ائدن يئني قهرمان گتيرمه‌يين. پيس و يا ياخشي مساله‌ني قهرمانين حل ائتمه‌سيني تامين ائدين.

 

6- حئكايه‌نيزه ياپيشين. بوتون بير پروسئس بويو سيز بلكه ده مين دفه اونو بوراخماق، تاماميله صيفيرلاماق ايسته‌يه‌جكسينيز. ائتمه‌يين! حئكايه‌نيزي مطلق تاماملايين. نه قدر چتين ده اولسا، ايكنجي دفه ايشله‌يين. ان ياخشيني سرگيله‌مك اوچون بوتون باجاريغينيزي اورتايا قويون. اوندان يقين كي، امتنا ائده‌جكلر، امتنا ائديلسه بئله سيز حئكايه‌نيزي يئنه كيملرسه گؤندرمه‌يه داوام ائدين. عيني زاماندا باشقا بيريني يازماغا باشلايين. سونرا باشقاسيني. اينانين هر دفه داها ياخشي بير نمونه اورتايا قوياجاقسينيز، هر دفه داها ياخشيسيني يازاجاقسينيز. ايلك حئكايه‌م اولانا كيمي من دؤرد كيتاب يازمالي اولدوم، بو منيم يئددي ايليمي آلدي. بو كله-كؤتورلو اوزون يولدور، آمما سونوندا گؤره‌جكسينيز كي بونا ده‌ير.


7- قايدالاردان امتنا ائدين (بو منيمكي‌لر ده اولا بيلر). هامييا مصلحت وئريلير، نظريه‌لر اؤيره‌ديلير، كيمسه سيزي حمايه‌سي آلتينا آلماق ايسته‌يير، كيمسه خصوصي بير ژانردا فورمالاشديرماق اوچون بيلدييي قايدالاري و يوللاري منيمسه‌ده بيلر. فيكريمجه، ايش او زامان داها مكمل بير فورما آلير كي بيز بوتون بو بيزه عاييد اولمايان شئي‌لري آرخادا بوراخيريق و بيزيم دوغرو اولان تك شئي اؤزو اولور.

+   شنبه 1393/03/03ساعت 12:31     | 

 
نوبئل اؤدوللو آمئریکا یازیچی‌سی ویلیام فاولکنئر-دن گنج یازارلارا ایپ‌اوجلار [مصلحت‌لر]

1. من اولماسایدیم سا ...

“من اولماسایدیم سا، منیم یازدیق‌لاریمی بیر باشقاسی یازا‌جاقدی. عینی شئیی هئمینگوای، دوستویئوسکی، بیزیم هامیمیز حاقیندا سؤیلمک اولار. بونا اؤرنک کیمی، شئکسپییئر-ین پییئس‌لری‌نین [نمایشنامه‌لرینین] یازارینا 3 آدای وار. اساس اولان - “هاملئت” و “یای گئجه‌سی‌نین یوخوسو”دور، اونلاری کیمین یازماسی یوخ”.

 
2. ائتکی‌لنمک پیس زاد دئییل…

“داها اؤنجه دئدیگیم کیمی، یازیچی کسینلیک‌له اخلاق-فیلان گؤزله‌ین بیری‌سی دئییل. اونا هاردان، نه لازیم‌دیرسا، گؤتوره‌جک، اؤزو ده بونو آچیق شکیلده ائده‌جک، بوینونا دا آلا‌جاق، چون اومید ائدیر، اورتایا اورتا بیر چیخیم [محصول] قویوب سونراکی نسیل ده اونون یازدیقلاریندان‌ نسه گؤتوره‌جک، اؤزو ده بو، یازیچی‌یا خوش گله‌جک، او بئله اینانیر ، اونون اؤز ده‌یرلی کئچمیشدن آلدیقلاریندان دا همین مؤلف‌لر یالنیز سئوینه بیلر”.


3. یئته‌نک، دوزنلیلیک، زحمت…

ایشین 100-ده 99-و یئته‌نک‌دیر [استعداد-دیر]… ایشین 100-ده 99-و دوزنلیلیک‌دیر [انتظام دیر]… ایشین 100-ده 99-و زحمت‌دیر. یازیچی هئچ زامان یازدیغین‌دان راضی قالماما‌لی‌دیر. هانسی‌سا ایشی همیشه داها یاخشی گؤرمک اولار. دایم اؤز ایمکانلاریندان‌ داها بؤیوک هدف‌لره کؤکلن. یالنیز اؤز معاصرلرین‌دن و سلف‌لرین‌دن اوستون اولماغا جان آتما. اؤزونو اؤتوب کئچمه‌یه چالیش.

4. مضمون لا اوسلوب

منجه، اوسلوب داها چوخ درجه‌ده ائله مضمون‌دان گله‌رک فورمالاشیر. یازیچی بئینینی اوسلوب [سبک] یاراتماقلا چوخ مشغول ائتمه‌مه‌لی‌دیر. اگر ائده‌جکسه، یازدیق‌لاری اوستو بزک، آلتی تزک اولا‌جاق. گؤز اوخشایا‌جاق، قولاغا خوش گله‌جک، اما مضمونجا دایاز اولا‌جاق.
5. یازیچی اوخوجو اولمالیدیر…
اوخوماق، اوخوماق، یئنه ده اوخوماق. الینه نه کئچدی اوخو – حتی زیری-زیبی‌لی، کلاسیک‌ین پیسینی-یاخشی‌سینی، اوخو، گؤر، بو ایشین چمی نه‌دیر. لاپ اودونچونون شاگیردی کیمی، باخ، اؤز اوستان‌دان اؤیرن. اوخو! اوخویوب جانینا هوپ‌دور! سونرا یاز. یاخشی آلینا‌جاقسا، بیله‌جکسن، خاراب اولا‌جاقسا، پنجره‌دن ویزیلدات گئتسین.

6. قارشیسی آلینماز…

بعضن بئله ائشیدیرم، کیم‌لرسه گیلئی‌له‌نیر، “عائله قورماسایدیم، اوشاق‌لاریم اولماسایدی، یازیچی اولاردیم” دئییر، یا دا کیم‌لرسه بئله شیکایت‌لنیر، “فیلان ایشدن جانیمی قورتارا بیلسه‌یدیم، یازیچی اولاردیم”. من بئله شئی‌لره اینانمیرام. منجه، سن یازما‌لیسانسا، یازا‌جاقسان و بونون قارشی‌سینی هئچ نه آلا بیلمز.

حاضیرلایان: حسین واحدی قايناق: http://huseynvahedi.mihanblog.com/post/603
+   سه شنبه 1393/02/30ساعت 9:34     | 

نظرلر، اؤنه‎ري‎لر

صباحي اؤيكو مسابقه‌سينه گؤره اولان نظرلرينيزي و اؤنه‌ري‌لرينيزي بيزه بيلديرين. نظرلرينيزله ايكينجي دؤوره‌سي‌نين داها ياخشي كئچيريلمه‌سينه يارديمجي اولابيلرسينيز.

+   پنجشنبه 1393/01/21ساعت 8:50     | 

۱-آپاردي سئللر ساراني ۱۹دنه ‌اوره‌يه ياتان توركو ناغيل، ۱۵۲صفحه ۶۵۰۰ تومان

۲- ساري گلين،۱۹دنه اوره‌يه ياتان توركو ناغيل،۱۶۸ صفحه ۶۵۰۰ تومان

بوناغيل‌لار ساده دانيشما ديلي ايله يازيليب و اورتامي(محيطي) ياشاديغيميز

اولايلاردان(اتفاقلاردان) الهام آلينيب و چوخو مرندين و كندلرينين كوچه باجاسيندا اوز وئريبدير.

بوناغيللاري اوخودوقجا اؤزوزو ناغيللارين قهرمانلاري يئرينده حس ائديب و

قهرمانلارين موشكول‌لريله ديلساي‌ليق ائده‌جكسيز.

بوناغيللارين بعضي‌سي۱۳۸۸-۹۰ايللرينده "آفتاب آذربايجان" آيليق درگيسينده

يايينلانيب و تورك ناغيل بيلنلر واوخوجولار طرفيندن قارشيلانيب وياخجي دَيَر

 وئريليبدير.

 بؤيوك آلله‌ين كومكيله ،اولسون كي بوناغيللار آنا ديليميزين ادبياتيندا بيركيچيك

 آدديم ساييلسين.

قايناق:تاريخ مرند و آثار سيد مرندي

+   دوشنبه 1393/01/18ساعت 11:38     | 

 


آذربايجان حيكايه يازيچيليغي‌نين اؤنجول‌لريندن اولان و چوخ تاسفله لاييقينجه تانينمايان احمد صادقي اشرافي(الف. نورانلي)نين حيكايه‌لر توپلوسو ايلك دفعه اولاراق ايشيق اوزو گؤردو. دوققوز حيكايه‌ني احتوا ائده‌ن “قيزيل آتيم و باشقا اؤيكولر” عنواني‌ايله ياييلان بو حيكايه توپلوسو عمار احمدي عزيز، رجب ابراهيمي، رضا كاظمي و صالح عطايي‌نين بيرگه امكداشليغي‌لا، اردبيل شهري‌نين “ساوالان ايگيدلري” نشرياتي طرفيندن ۱۰۰۰ نوسخه‌ده ياييليبدير. كيتابي اردبيل و ائله‌جه‌ده آذربايجانين باشقا شهرلرينده‌كي اعتبارلي كيتاب ماغازالاريندان و تهراندا ايسه فرزانه و يوسوف‌اوغلو كيتاب ماغازالاريندان الده ائتمك مومكوندور.

قايناق:ايشيق
+   دوشنبه 1393/01/18ساعت 11:35     | 

يازار: گلوريا كمپتون

فارسجادان چئويرن: حسين واحدي

نه زامان شخصيت‌لرين حيكايه‌ده دانيشمالاري گركلي‌دير؟ نه دئسين‌لر؟ نه دئمه‌سينلر؟ نئجه دئسين‌لر؟ دانيشيق‌لا نئجه ائتمك اولار شخصيت‌لرين هوسين اوزه چيخارديب همده تانيملاما[شخصيت پردازي] ايله، اوخوجو اونلا جانداشليق[همدلي] حسي تاپسين؟ نئجه كاراكتئرلرين دانيشيق‌لاري بحران‌لا آسلانيشي حيكايه‌ده چوخالدا بيله‌ريك؟
نئجه دانيشيق‌لاري حيكايه، روايت و حادثه‌لري ايله بيرلشديره بيله‌ريك؟
نئجه حيكايه‌ده يئرله زامان بيلگي‌لريني دانيشيقلاردا آچيقلايا بيله‌ريك؟
بو چئشيد[نوع] سؤال‌لارا، خانيم كمپتون چاليشيب “‌دانيشيق‌” [دييالوق] آدلي اؤز كيتابيندا اوخوجولار اوچون ايضاح گتيرسين. يازيچي‌نين باخيشي ايله حيكايه‌ده دانيشيق يازما، چوخ دا چتين ايش دئييل، آما بيز اونو چتينلشديريريك. او بو كيتابدا چاليشيب دانيشماني اوخوجويا چوخ راحت و طبيعي صورت‌ده آچيقلاسين، نفس چكمه‌يه تاي.


ادامه مطلب
+   دوشنبه 1393/01/18ساعت 11:28     | 

اورميه‌نين حوزه هنري‌ سيته‌سي‌نين يايديغي خبر اساسيندا "اورميه ادبي اؤدولو" نون قازانان‌لاري معلوم اولوندو. بو اساسدا  حئكايه بؤلومونده مجتبی اسماعیل زاده، مریم علیپور و حسین واحدی سيرايلا بيرينجي‌، ايكنجي و اوچونجو يئرلري قازانديلار. بو ايل كئچيريلن مسابقه بو ادبي اؤدولونون ايلك دؤوره‌سي ساييليردي. اطرافلي معلومات اوچون بوراني تيكله‌يين.

+   پنجشنبه 1392/12/22ساعت 9:38     | 

آزادلیق رادیوسونون مدنیت پورتالی اولان oxuzali.az دا شعر و حکایه مسابقه‌سی باشلاندی. "ادبی آزادلیق-2014" مسابقه‌سینه هر کس قاتیلابیلر.

اثر گؤندرمه مؤهلتی: 4 آپرئل 2014 (15 فروردین 1393)
آرتیق معلومات اوچون آشاغیداکی لینکی تیکله‌یین:
http://www.azadliq.org/content/article/25284243.htm

+   جمعه 1392/12/16ساعت 20:29     | 

خانيم فرانک فرید-ين بیرینجی حکایه توپلوسو "خانيم الي" آدييلا ايشيق اؤزو گؤردو. بو باشاريني سايين حؤرمتلي يازاريميزا تبريك دئييريك.

+   یکشنبه 1392/12/11ساعت 10:47     | 

ilgar

تبریز ادبی اؤدولونون سونوج‌لاری آچیقلاندی. تورکجه حکایه بؤلومونده ایلقار موذن زاده، "ساری" آدلی حکایه‌سینه گؤره بیرینجی یئری قازاندی. بیزده بو قازانمانی سایین موذن زاده جینابلارینا تبریک دئییب بو عزیز یازاریمیزا اوغورلار آرزیلاییریق.


یاریشمانین سونوجو:
1- ایلقار موذن زاده : "ساری" ( مشکین شهر)
2- اکبر رضاپور :"قیرمیزی داغ" ( تبریز)
3- حسن ثمودی : "اینک لر آدامی باش تاپار" ( تبریز)
4- رضا کاظمی: "آق پاپاق قاراپاپاق" (اردبیل)
5- سپیده شراهی:"خوفله تهران" ( تهران)

+   شنبه 1392/12/10ساعت 9:1     | 

نیگار خیاوی

ادبیاتیمیز بو 20-30 ایل ایچینده اوزو ایره­لییه دوغرو گئتمکده اولوب. بونون سندی ده آرا -سیرا کئچیریلن ادبی اؤدوللره گؤندریلن اؤیکولر  و شعرلردیر. منیم 5-6 ادبی یاریشدا داور کیمی قاتقیم اولوب، هر دفعه­سینده ده بو ایره­لیله­ییشین شاهیدی اولموشام. ملتیمیزین سایینا گؤره بو ادبی اؤدوللره قاتیلان حکایه لر نئچه­لیکجه آز اولسا دا، نئجه­لیک باخیمیندان دیرلی و اومود وئریجی  اولوب هر زامان. صباحی ادبی اؤدولونه گؤندریلن حکایه­لرین ایچینده دیققتیمی چکن حکایه­لر اوخودوم. بو او دئمکدیر کی ، یازارلاریمیزدا گؤزل اثرلر یاراتماغا گوجلو پتانسیللر وار و بو دا او دئمکدیر کی، یازارلاریمیز دونیا ادبیاتینی میسمیل اوخویوب اوغراشیرلار. آما بو دا وار کی، تکجه یاریشدان یاریشا قورشانیب یازماق بیر میلته ادبیات قازاندیرماز. یاریشلار ادبیاتا جیدی شکلینده یاناشمایا ساده­جه بیر لنگر رولونو اوینایا بیلر. آرزوموز بودور بو یاریشدا قازانانلار دا قازانمایانلار دا ادبی اؤدول هایهویو بیتدیکدن سونرا دا قلمله یولداشلیغین آردینی گلسینلر و ادبیات سئورلره یئنه گؤزل اؤیکولر اوخوماغین حظینی دادیزماغا داوام ائتدیرسینلر.

حکایه­لردن 10 دنه­سینین­ سئچیلمه­سی بو معنادا دئییل کی، قالان حکایه­لر گؤزل دئییلدیلر، من گؤندریلمیش 50 حکایه ایچینده بونلاردان باشقا دا گؤزل حکایه­لر اوخویوب و حظ آلدیم. آما نئیله­مک، قوروجو هیئتی آنجاق پوئن و نمره وئرمک یؤنتمیله تکجه  10 حکایه­نین سئچیمینی ایسته­میشدی، بیزلر ده اونو یئرینه یئتیردیک. آما اؤنملیسی اودورکی، بو کیمی حرکتلر قلملری ترپدیب اویاتسین. او گونون آرزوسویلا ...  

اؤز آدیما، بو یاریشا قاتیلان بوتون هرکسه، هابئله قوروجو هیئتینه، ژوری پرسونلینه، اوزده و آرخادا چالیشانلارا ساغوللاریمی، سایغیلاریمی سونورام. 

+   دوشنبه 1392/09/04ساعت 22:29     | 

تبریز فرهنگی-هنری سازمانی‌نین (تبریز شهرداری‌سینه باغلی) یایدیغی بیلدیریش اساسیندا اوچونجو "تبریز ادبی اؤدولو" کئچیریله‌جک. بو فستیوالدا ایکی بؤلوم (شعر-اؤیکو)  ایکی دیلده (تورکجه-فارسجا) یئرله‌شیبدیر. هر بؤلومون اوچ ایلک یئرینی قازانان‌لارا اؤدول وئریله‌جک. (بیرینجی 2 میلیون، ایکینجی  1.5 میلیون و اوچونجو 1 میلیون تومن). اطرافلی معلومات اوچون بورانی تیکله‌یین.

+   دوشنبه 1392/09/04ساعت 21:10     | 


منه دئییب‌لر اوتور اؤزوندن یاز ووراق سایتا. منجه بو اوتوبیوگرافی‌لره اینانمایین. من بیرآز آلچاق‌گؤیول آدامام آخی. بویوم آمما اورتادی. یعنی شرق مملکتلرده اورتا حئسابلانارام. حتما دئییرسیز بیزه نه !

آخی دئییب‌لر اوتوبیوگرافین طنز اولسون. آخی قارداش کیم اؤزونو میرتا توتار؟ من تانینماق اوچون یوخ بیر میلیونو قازانماق اوچون بو یاریشمایا قاتیلمیشدیم. کی الحمدالله قازاندیم. منی تانییانلار بیلیر کی ساختمان ایشله‌دیرم. بونا دوشونورم کی بو بیر میلیونو ساختمانین هاراسینا یاپیشدیریم کی گؤزومون قاباغیندا اولسون! گلیم گئدیم، مثلا ائوین بیر بوجاغینا باخیب دئییم " هه! بو دووارداکی  کرپیچلری تصور ائله‌یین، بولار حیکایه‌مین کلمه‌لری‌دی! یا دا ستونا اشاره ‌ائله‌ییب دئییم " بو ستونو حیکایه‌مین پارانتزلری‌نن قووزامیشام! " حتما بو دفعه ده منه دئییرسیز " عجب ماتریالیست آدامسان"  نه دئییم آخی؟ آغاجان و خانیم‌جان! ادبیات منیم اوچون ایکینجی اولویت‌دیر. بونو هر هفته حیکایه جلسه‌لرینه یوباندیغیمدان بیلیرم. دئییبلر "دئ کی هاچاندان تورکو یازیرسان ؟" آخی نه فرق ائله‌ر تورکجه یازماغی هاچاندان باشلادیغیم؟ توتاق کی 10 ایل قاباق یا صباحی اؤدولونه بیر گون قالاندان باشلامیشام. شرط بودو ایندی بیر میلیون جیبیمده !

شوخلوقدان کئچدی اوسته‌کیلری اینانین!

کیتاب چیخارتماغی دوشونمورم هله‌لیک. بو سؤز البته حیکایه توپلوسونا عاییدیر یوخسا من رومان حضرتلرینه  جسارت ده ائتمیرم.

اومود ائدیرم او گون گلسین، اؤدول بیزی یازدیرماسین. اومود ائدیرم ادبیات بیرینجی اولویت اولسون. اومود ائدیرم پول داش آلتیندان یوخ حیکایه‌دن،شعردن،کیتابدان چیخسین. سیزی سئویرم و صباحی اؤدولونده امک وئرن اجرایی هئیته و داورلره اؤز تشککورومو بیلدیریرم. بو آرادا بیر میلیونو جیبیندن وئرن شخص و یا اشخاصلاردان اؤزل تشککور ائله‌ییب اونلاری اؤدولون پولوندان بیر دزگاه تبلت گالاکسی 10.2 آلاجاغیما و اوردا اوخویوب یازاجاغیما اطمینان وئریرم. چوخ ساغولون. خوش کئچدی.

+   شنبه 1392/09/02ساعت 15:1     | 

صباحي اؤیکو اؤدولونونون اجرایی هئیتینه یورولماسین دئییب، بو اؤدولون داومینی آرزولاییرام. بئله مسابیقه‌لرین تاثیری، تورکجه حکایه ادبیاتیمیزین اینکیشاف ائتمه‌سینده دانیلماز بیر مسئله‌دیر. 
«اؤلوم دئییل» حکایه‌سینین یازارینا بیرینجی یئری قازاندیغی اوچون تبریک‌لریمی سونوب، اوسته‌لیک اؤدول قازانمایان یازارلاریمیزا، مسابیقه‌یه قاتیلماقلارینا گؤره تشکور ائتمه‌لییم. مسابیقه‌ده قازانماغین سئویندیریجی بیر اولای اولدوغو دانیلمازبیر مسئله‌دی. بونونلا بئله بیر یازار اؤزونه اینانیب، اثرینی گؤندرمه یی له داها آرتیق تقدیره لاییق‌دیر. صداقت، مسئولیت و اینانیجمیزی قوروماقلا تورکجه حکایه ادبیاتینین گونو گوندن آرتیق اینکشافینی آرزو ائدیرم. 
حورمتلریمله: رقیه کبیری 
92.9.1

+   شنبه 1392/09/02ساعت 8:29     | 

حامد احمدی
نم هانسی یازیچیدان اوخوموشدوم «بیر یازیچی‌نین گؤزل خاطره‌لریندن بیری اؤز چاغداش‌لارینین اثرلرینی اوخوماق ساییلا بیلر». آذربایجانیمیزین ادبیاتیندا کیتاب قیتلیغی، درگی یوخلوغو و بیراز دا تنبللیک (چالیشیرام بیراز ادبلی یازام!) اؤز اثرلریمیزی اوخوماق فورصت‌لرینی گئتدیکجه آزالدیر. بیر یاندان دا شعرین حیکایه‌یه غالیب گلمه‌سی و ادبیاتچی‌لارین چوخونون شعر آلانیندا آت چاپدیرماغی، حیکایه گؤیونو تبریزین گئجه‌لرینه تای اولدوزسوز بوراخیر. بو آرادا گاهدان بیریلرینین ماراقلانیب بیر حیکایه فستیوالی قورماغی، بارات گئجه‌سینده فیشفیشا بازلیغا اوخشور و اونو دَیرلندیریب اونا اؤنم وئرمک لاپ کیچیک گؤره‌ویمیز ساییلا بیلر. بورا کیمی بئش حیکایه یاریشماسیندا قاتقیم اولوب؛ بیرینجیسی بیرلیک و یاشماق درگی‌لرینین واسطه‌سییله قورولموش «سونای حیکایه اؤدولو» ایدی. سانیرام سونای حیکایه اؤدولو آذربایجاندا بیرینجی دفعه اولاراق بیر حیکایه یاریشماسییدی. سونای‌دان سونرا، رضا کاظمی جنابلارینین چالیشمالارییلا «مین بیر گئجه حیکایه اؤدولو» ایشیق اوزو گؤردو. بیر دفعه ده سایین دنیوی جنابلارینین هیممتییله قورولموش «آنامین یایلیغی» یاریشماسیندا داور اولدوم (آنامین یایلیغی بلکه بورا کیمی تکجه سورجلی اولان ادبیات یاریشماسی ساییلا بیلر)، آزادلیق رادیوسونون 2013-جو ایلده کئچیریلن ادبی یاریشمادا دا بیرینجی یئری قازانا بیلدیم (بو اؤدونو مندن بیر ایل اؤنجه حؤرمتلی خانیم رقیه کبیری قازانا بیلمیشدی) و نهایت بو ایلده صباحی اؤیکو اؤدولونون داورلییینه فخرلندیم.
بوتون بو یاریشمالاردا یئنی سسلری ائشیتمک منی ماراقلاندیریردی. داها دوغروسو آدام گاهدان اؤز هنده‌ورینده‌کی آدام‌لارین سؤزونو ائشیتمکدن یورولور. من بیر یازیچی اولاراق گؤیلوم ایستیر بیلم بیر اورمولو، زنگانلی، اردبیللی و... ادبیات پنجره¬سیندن دونیایا نئجه باخیرلار؟ اونلار بیر کاراکتئرین آغزینا هانسی دیالوق‌لاری قویورلار؟ هانسی موتیف‌لر اونلاری حیکایه یازماغا ماراقلاندیریر؟ دیله نئجه باخیرلار؟ و مینلر بئله سوال. عومومن ده بو یولدان چوخلو ادبی دوست‌لار قازانا بیلمیشم. بو موسابیقه¬لرین گؤزل بیر یؤنو ده وار، اوخودوغون اثرلرین هئچ بیرینین یازیچی‌سینی تانیمیرسان، بعضی‌لرینی بلکه اوخشادا بیلرسن «مثلن حامد احمدی چوخ یامان یووز یازار اثرلرینده، بو حتمن اونوندو!»، آنجاق نهایتده اثرین اؤزونه نومره وئریرسن (البته من بو نومره وئرمکله موشکولوم وار و اونو دا آچیقلایاجام) و بو مسئله اثرلری داها دیققتله اوخوماغا ماراقلاندیریر.
صباحی اؤیکو (بیز دالی قالمیشلار حیکایه دئییریک بونا، هله من گاهدان کیریخیب داستان دا دئیرم!!!) اؤدولو ده اؤزونه گؤره گؤزل بیر فورصت ایدی بو آرادا. یازینین آردیندا چالیشیرام اؤز گؤروشلریمی بو یاریشمادان آچیقلایام، بونلارین بعضیسینی بیر اوستونلوک کیمی بعضیسینی ده بیر آخساقلیق کیمی دوشونورم. عین حالدا چالیشیرام اطرافلی بیر باخیشیم اولسون حیکایه دونیامیزا، بو گونکو گنج ادبیاتیمیزا (بونو دا آرتیرمالییام که هله سونوجدان خبریم یوخدو و البته بو مسئله‌نین هئچ بیر تاثیری ده اولا بیلمز بو یازیدا).
صباحی یاریشماسینا 50 حیکایه چاتمیشدی. سیز بونو نئجه دَیرلندیریرسیز؟ من شخصن هئچ اولماسا بیر 20 یازیچی تانیرام، هردن بیر اولانلاری دا آرتیرسام 40 آد سایا بیلرم. بیر یاندان دا 30 میلیون تورک آدلاندیردیغیمیز آذربایجاندا هئچ اولماسا هر 100 مین نفردن بیری الی قلملی اولسا 300 نفر اولارلار (بونون دا یاریسینی دا چون سیزسیز چیخیرام، قالار 150!) منجه هئچ اولماسا 100 حیکایه گؤرمه‌لییدیک بوردا. نییه گؤرموروک؟ بعضی¬لر یازیر آمما (منه تای!) کیلاس قویوب یوللامیر. بعضیلری ایستیر یازسین، آمما فیسبوکدان باش آچیب واخت آییرا بیلمیر (ایندی تو خود حدیث مفصل بخوان از این مجمل!)
آمما بو 50 حیکایه‌نین ایچینده بلکه 10 یا 15 حیکایه منیم نظریمی اؤزونه ساری چکه بیلدی. قالان یازیلار یا ناغیل ایدیلر، یا دوز یازی یا دا ایرفاقلا پلات حددینده قالمیشدیلار. آنجاق سئودییم او 15 اثر ده بوتونلوکده منیم قوراللاریمی یئرینه یئتیره بیلمیردی. بیرینین سونوجو سونسوز ایدی، بیرینین باشلانیشی ایرادلییدی، بیرینین دیالوق¬لاری عئیبجر ایدی، بیری بوتون گؤزللیکله بئله پیتلاشیق و داغینیق ایدی و... (دیققت ائله¬سز من باشقالارینا تای دیل‌شوناس دئییلم! بیر ادبی اثرده دیلدن ساوایی منی ماراقلاندیران چوخلو زادلار وار. یوخسا دیل مسئله‌سینی ده نظرده آلساق بعضی ایشلرده آخساقلیق واریدی، آمما هانسی دیل؟!!!).
بو آرادا ایجرایی هیئت اثرلری گؤزلجه بیر یئره توپلاییب هامیسنی ساهمان بیزه گؤندرمه‌سی ماراقلییدی. آمما داورلرین آدینی سونوج‌لار بیلینمه‌دن آچیقلاماق منجه بیر سهو ایدی (ایجرایی هیئت بو مسئله‌نین ایضاحیندا خاریجی اؤلکه‌لرده بو ایشین اولدوغونو دئییب بو ایشی یاسالاماق ایستسه ده، آنجاق من بورا اورتا دوغودو دئیه بئلنچی «قرتی بازی»‌لره اینانمادیغیمی بیلدیرمه‌لییم!). دئدیییم کیمی او تانیدیغیم 30 نفرین 20-سی بو یاریشمایا اثر گؤندرسه من هئچ اولماسا او اثرلرین بئشینی اوخوموش اولارام. بو اوزدن بیر یاندان من اثر صاحیبینی تانیدیغیما گؤره، بیر اوزدن ده اثر صاحیبی منی تانیدیغینا گؤره ایش لاپ پیتلاشیق دوشور. اونا گؤره ده تانیدیغیم اثرلره نومره وئرمکده سیخیلیردیم، بوندان بئله کی او اثرلر چوخ گوجلو ایدیلر (و آمما نومره مسئله‌سی).
ایجرایی هیئت بیزدن اثرلره نومره وئرمه‌یی ایسته‌میشدی. بیرینجی مرحله‌ده 50 اثره صیفردن اونا کیمی نومره وئرمه‌لییدیک. من اثرلرین هئچ بیرینه صیفر وئره بیلمه‌دیم، نییه کی اونلارین بعضیسینده گؤزل پارچالار وار ایدی (اونسوز دا جسارت ائدیب اؤز اثرینی بیر یاریشمایا گؤندرمه‌یین هئچ اولماسا بیر نومره‌سی اولمالیدیر)، عین حالدا اثرلرین هئچ بیرینه ده 10 وئرمه‌دیم، نییه کی دونیادا بیر ایکی یازیچیدان (قطعن اونلارین بیری من دئییلم!) ساوایی هئچ کیمی بوتون نومره‌یه لاییق بیلمیرم (یئری گلمیشکن بیر خاطره‌نی تعریفله‌مه‌لییم (ایندی قاباقکی سؤز ده یادیمدان چیخاجاق) – پارانتئز ایچینده پارانتئز آچماقدا او ایشلردندی!- لیسانس دؤرونده درس‌لرین بیرینده کیلاسین هامیسی 14، 15 و بئله نومره‌لر آلمیشدیلار. آنجاق کیلاسیمیزین لاپ زیرنگ شاگیردی خانم نم نمنه 19 آلا بیلمیشدی. بو خانیم اؤزگوونللیکله (مندن بئش بتر!) اوستادین یانینا گئدیب اؤزونه یوخاری نومره آلدیغینا گؤره، 20 ایستمیشدی. اوستادیمیز گؤزلویونو چیخاریب، سینمایی گولوب - بو سینمایی گولمه‌یین تعریفینی منیم فیسبوک صفحه‌مدن تاپا بیلرسیز- دئدی «دخترم! خود جناب فروید هم بیان اینجا من بهش 20 نمیدم! 20 مال کسیه که همه چی رو از این علم بدونه!»)
ایکینجی مرحله‌ده ده داورلرین بیر عیدده‌سینین ایسته‌یینه رغمن یئنه ده نومره مسئله‌سی واریدی، بو دفعه اول 10 حیکایه-یه یوزدن نومره وئیرلمه¬لییدی (نه فرق ائله¬دی جریان؟ هئچ زاد، منه تای تنبل داور گؤتوروب وئردییی نومره¬نین قاباغینا بیر صیفر قویسایدی ایش حللیدی!) داورلرین بعضیسینین ایسته¬یی بو ایدی کی بیر گون هامی بیر یئره توپلاشیب او 10 اثره گؤره دانیشیب نظرلریمیزی بیلدیرندن سونرا هئچ بیر شکی شوبهه اولمادان بیرینجی اثری اعلام ائله¬یک. بو آرادا هر داور دَیرلندیردییی اثره گؤره اؤز باخیشلارینی آچیقلایا بیلردی و سئچیلن اثر بوتون داورلرین دوشونجه¬سیندن آسیلی بیر نظر اولا بیلردی. سئچیلن اثرده هر بیر ایراد دا اولسایدی داورلرین بوینونا دوشردی. بو قرار یئرینه گئتمه¬دییی زامان من و داورلرین بیری دؤرد اثر اولویت¬سیز سئچیلسین دئیه ایجرایی هیئته اؤنردیک، آنجاق بو مسئله ده قبول اولمایینجا ایشین قئیدینی ووروب قورال¬لارا بویون اَیدیم (شخصن بو مسئله¬دن چوخ اوزولدوم. اصلینده دؤرد بیرینجی اثر منیم باخیشیمدان بیر سیرادا یئرلشیردیلر و هئچ بیرینی بیرینجی آدلاندیرا بیلمیردیم. البته بو آرادا ایجرایی هیئتین اؤزونه گؤره توضیحلری واریدی. اونلارین دئدییینه گؤره یاریشمانین توتدوغو قورال¬لار پوزولمامالییدی، آنجاق چوخلو فستیوال¬لاردا متمایز بیر اثر اولمایینجا نئچه اثری بیر سیرادا تانیتدیرارلار- مثلن سونای حیکایه اؤدولونده بو ایش اولدو).
آمما بیر اثره نئجه نومره وئرمک اولار؟ یعنی بیری صاباح گلیب منیم یاخامدان یاپیشیب سوروشسا نییه منیم حیکایه¬مه 8 وئردین، یا منیم اثریمه 5، نه دئیه بیلرم؟
بو مسئله¬نین بیر چوخ بؤلومو هر اینسانین تنقیددن اؤنجه¬کی باخیشینا قاییدیر. بیر اثری اوخویارکن و قورتاراندان سونرا من ده بیر حیس یارادیر. بو حیسسین منیم نومره¬لریمده ائتگیسی اولور. بو حیسده اثرین آدی، اونو اوخویارکن حالیم و... ده تاثیری اولار بیلر. آمما بیر یازیچی اولاراق نومره¬نین چوخ بؤلومو آشاغیدا سیرالادیغیم فاکتورلاردان اولوشور:
اثرین منطق روایی¬سی: هر بیر اثرین بیر سؤزو وار. بو سؤز نه قدر رئال دونیایلا اوست اوسته دوشه بیلیر؟ (البته سحیرلی رئالیسم و یا سورئالیستی اثرلرده ده روایی منطق واردی) منجه یازیچی بیر حرفه¬ای یالانچیدیر. یالانچیلیق باشارمایان اینسان یازیچی اولا بیلمز. آنجاق حیکایه او زمان یارانیر کی دئدییین یالانی او قدر گؤزل دئیه¬سن کی اوخوجو اینانا. مارکز کیمی «یوز ایل تنهالیق»ـدا. گراهام گرین کیمی «گؤزل آمریکالی»ـدا، کافکا کیمی «مسخ»ـده.
شخصیت بسله¬مک (کاراکتریزاسیون): شخصیت¬لری بسله¬مک تکجه اونلاری قولچاق کیمی اویناتماق دئییل. لاپ حرفه¬ای قولچاق اوینادان¬لاریندا قولچاق¬لارینین ساختا اولدوغونو راحاتجاسینا حیس ائده بیلریک. عین حالدا شخصیتی بسله¬مک تکجه اونون باش گؤزونو توصیف ائتمک ده دئییل، بو ایشی هر کیم گؤره بیلر. هم ده شخصیتی بسله¬مک بیر نفرین اوستونه آد قویوب، آغزینا دیالوق یاراشدیرماق دا دئییل. او زامان شخصیتی بسله¬مک نه¬دیر؟ شخصیتی بسله¬مک منجه یوخاریدا دئدیکلریمین هامیسی حرفه¬ای دورومدا و بیر سیرا باشقا زادلاردی. شخصیت ائله هنده¬وریمیزده¬کی آدام-لاردی، محله¬میزین باققالی، تاکسی شوفئرلری و... شخصیت بالزاک¬ـین باباگوریوسودو، رومانی قورتاراندان سونرا اوتاغیندان چیخیب آغلارکن دئدی: باباگوریو اؤلدو! دوغروسو بیزلر شخصیت¬لریمیزله نه قدر ایلگیلیمیز وار؟ نه قدر تانییریق اونلاری؟ یوخسا ائله بیر آد اولسونلار دئیه اونلاری کاغاذلاریمیزین اوستونه گتیریریک؟
بو 50 حیکایه¬نین ایچینده آدام¬لارین چوخو شخصیت یوخ بلکه تیپ حددینده قالمیشدیلار، بعضیسی ده هئچ کؤلگه دئیه بیر شئی دئییلدیلر. مثلن بیر تیرئلی شوفئرینین تیپیک کاراکتئری وار، اونون دینله¬دییی موسیقی ایبراهیم تاتلی¬سس (تاتلئس!!!)، بارماقلاریندا «دست دلبر» اوزویو، ائشمه بیغلاری وار، قولوندا دا «سلطان قلب مادر» کیمی بیر شئی دویدوروبدو. بو شوفئر او زامان کاراکتئر اولا بیلر کی باشقا شوفئرلرله بیر فرقی اولسون، بیر تیکی اولسون، اؤزل بیر ایشلر گؤرسون. چوخلو سانتی مانتال اثرلرده تیپیک آدام¬لاری گؤره بیلریک، فالچی¬لار دا ائله بو تئکنیکله بیزیم آلین یازیمیزی اوخویورلار «بیر موسافیرته گئده¬جکسن، یولونو گؤزله¬ین وار، یاخجی بیر ایتتیفاق دوشه¬جک و...».
روایتین اتمسفئری یا فضا یاراتماق: هر حیکایه¬نین اؤزونه مخصوص بیر هاواسی وار. بلکه بوتون صنعت¬لرده بو مسئله¬نی گؤرمک اولار. غملی بیر ماهنی¬یا شاد موسیقی یاراشدیرماق اولماز، جینایی بیر فیلمه تئمپوسوز و یاواش صحنه¬لر اویغون دئییل. بو مسئله¬نی اثرین بوتونلویونده یاراتماق یازیچی¬نین هنرینی گؤرسدیر. حیکایه¬لرین بعضی¬سینده خوصوصن سئچیلن 10 حیکایه¬ده بو مسئله¬نی گؤزلجه گؤرمک اولاردی. یازیچی¬¬لاریمیز حیکایه¬نین موضوعسونا اویغون ریتم¬لر سئچه بیلمیشدیلر و آدام حیکایه¬نی اوخودوقجا لذت آپارا بیلیردی.
تئکنیک و فرم: مدرن حیکایه¬نی کلاسیک حیکایه¬دن آییرا بیلن اصلی فاکتورلاردان بیری تئکنیک و فورمدو. حیکایه¬ده رومانا رغمن یازیچی¬نین الی باغلیدی. من بو ایکیسینی آجیله بنزه¬درم. رومانی چارشنبه یئمیشینه بنزتسک آنجاق حیکایه بادام یا پوسته اولا بیلر. ائله او اوزدن ایجاز مدرن حیکایه¬نین اصلی عونصورلریندن بیری اولا بیلر. اوخوجونو آخماق و قانماز فرض ائتمه¬مک، سؤزون بیرازینی دئییب قالانینی اوخوجویا تاپشیرماق ایجازین اصلی شرطیدی. تاسسوف کی اثرلرین بیر چوخوندا بو مسئله¬یه دیققت اولمامیشدی. بعضیسینده ده او قدر سؤزلر گیزلنمیشدی آدام گیجه¬لیردی (البته تئکنیک و فورم مسئله¬سینه گؤره چوخلو سؤزلر ده وار، آنجاق داها دوغروسو حالیم یوخدو یازام! سیز ده ائله بیلین کی بیلمیرم!!!). بیر ده اثرده سؤزو گئدن مدرن و شهری فضا منیم اوچون اؤنملی بیر مسئله ساییلیر. بو مسئله¬نین سئچیم¬لریمده آز تاثیری اولمامیشدی.
دیل: دیل مسئله¬سی بیزیم ادبیات آلانیمیزدا همشه بیر مسئله اولوب و نظره گلن هله ده چؤزولمز بیر مسئله کیمی قالاجاق. اؤزلرینی تنقیدچی آدلاندیران چوخلاری دانیشماغا سؤز تاپمایاندا بیرینجی دیل آخساقلیق¬لارینا بارماق قویورلار. اونلار دیل مسئله¬سینده «دیل قورولوشو»، «فارسجا دوشونوب تورکجه یازماق» و «یئرسیز سؤزجوکلرین ایشلنمه¬سینی» ازبرله¬ییب یئرلی یئرسیز ایشله¬دیرلر. اصلینده من بئلنچی تنقیدچی¬لری گؤرنده رحمتلیک (جوما آخشامی گلدی رحمتینی آپاردی!) چخوف جنابلارینین سؤزونه دوشونورم. آمما بو حیکایه¬لرده دیل مسئله¬سی منیم اوچون لاپ سون سیرادا یئرلشیردی. داها دوغروسو بعضی حیکایه¬لری اوخویا بیلمه¬دیم بو آخساقلیق¬لارا گؤره یا بیر سیرا اثرلرده یازیچی اؤزو ده قالمیشدی نئیله¬سین، بعضی یئرلرده تورکجه¬سی اولان فارسجا سؤزجوک¬لر ایشله¬دیردی، بعضی یئرده ده عجاییب غراییب استانبول تورکجه-سینی... هر حالدا دیل باخیمیندان بیر ادبی اثره باخماق (اؤزو ده بیزیم دوروموموزدا) منجه بؤیوک اینصافسیزلیق اولا بیلر ادبیاتیمیزا.

بو قارماقاریشیق اوزون یازینین سونوندا اعلام اولونان نتیجه¬دن و ایشین پروسه¬سینین بعضی بؤلوملرییله راضیلاشماسام دا، اثرلرینی بیزلرله پایلاشان بوتون یازیچی¬لارا یاشاسین دئییب، قلم¬لری وار اولسون آرزیلاییرام. هم ده صباحی اؤیکو اؤدولونون ایجرایی هیئتیندن منه داورلیق تکلیفینی وئردیکلرینه گؤره اؤز تشککورلریمی بیلدیرمه¬لییم. و بو آرزییلا بو مکتوبو باشا چاتدیریرام کی بو ایش داواملی اولسون و صباحی اؤدولو گله¬جک ادبیاتیمیزدا گؤتوردویو آددیم¬لار سونسوز قالماسین؛ اونسوز دا بیز بو یولدان بیر نئچه یازیچی قازانا بیلدیک ادبیاتیمیزا، مینلر اولسون بو... (مین¬لر ده اولا بیلر، میندن منظور میندی بوردا!).
آبان آیینین اییرمی اوچو، ایل¬لردن مین اوچ یوز دوخسان ایکی، تبریز

یازینین عونوانی ریموند کارورین حیکایه‌لرینین بیریندن آلینیب
+   جمعه 1392/09/01ساعت 13:46     | 

صباحي اؤيكو ياريشماسي‌نين بيرينجي ايلي ارديبهشت آیي‌نين 22 سينده بو وئبلاگدا بير بيلديريش يايماقلا باشلاندي. اثرلرين سون مؤهلتينه‌دك (31 شهريور1392) 50 حكايه گليب اليميزه چاتدي. بو حكايه‌لرين هر بيري‌سينه بير كود وئره‌رك حؤرمتلي داورلريميزه يوللاديق. 15 آبان گونونده عزيز داورلرين وئرديييي امتيازلار اساسيندا ايلك اون حكايه‌ميز اوزه چیخدی. ايكينجي مرحله‌ده داورلر بو ايلك اون حكايه‌ني اينجه‌له‌ييب بيريني سئچديلر.  بو اساسدا بيرينجي صباحي اؤيكو اؤدولو "رضا عبدي" جينابلارينا عاييد اولوندو. رضا عبدي يازديغي "اؤلوم دئيیل كي" حكايه‌سينه گؤره بو ياريشمانين بيرينجي يئرينده داياناراق بير ميليون تومن اؤدولو قازاندي. بو عزيز يازاريميزي تبريكله‌ييب، ياريشمايا قاتيلان باشقا حؤرمتلی يازارلاردان هابئله دَیرلی داورلردن تشككوروموزو بيلديره‌رك هاميسینا اوغورلار آرزيلاييريق. دوققوز داها حكايه‌نين يازارلارينا دا ياديگارليق بير هديه يوللاييب تقدير ائده‌جه‌ييك. اومود ائديريك حكايه ساحه‌سينده چاليشان بوتون دوست‌لار گلن ايل‌لرده بيزه قاتيليب بو ياريشمانين داها گوجلنمه‌سینه یاردیمجی اولسونلار.

ادبییاتیمیزا اوغورلار

صباحی اؤیکو اؤدولونون اجرایی هئیتی


ایلک اون حکایه:

1- اؤلوم دئيیل كي - رضا عبدي (تبریز)

2- گؤزومو يوموب آچيرام - هليا بشيرزاده (تهران)

3- ساري - ايلقار موذن زاده (خیوو)

4- اوره‌ييمده پالتار يووان خانيم - رضا جاوان (سالماس)

5- اؤلوم ماهنی‌سی - رحیم اقدم خواجه (تبریز)

6- ايلان ايلي - فرانك انصاري (اردبیل)

7- چیلپاق سؤیود آغاج‌لاری - مجید راستی (تبریز)

8- آغاج‌لارین آراسیندان گلن خیشیلتی سسی - پری آخته (اردبیل)

9- گلدی-گئدر - سعید نجاری (کویو)

10- پنجره - مهدی اصولی (خیوو)

+   پنجشنبه 1392/08/30ساعت 8:44     | 

1- بو لیستده ایلک اون حکایه‌نین یازارلارینی هله گتیرمه‌میشیک. 1 آذر گونو بو اون یازارین آدینی دا اعلان ائده‌جه‌ییک.

2-  حکایه‌لر گؤنده‌ریلن تاریخ‌لر اساسیندا سیرالانیبدیر.

3- بعض حکایه‌لر باشقا یاریشمالارا قاتیلیب یا دا درگی‌لرده و سیته‌لرده یاییملانمیشدیر. بو سبب‌لردن اؤترو بو حکایه‌لری بیرینجی مرحله‌ده داورلیک ائدیلن‌دن سونرا سیرادان چیخارتدیق. (داورلر بو حکایه‌لری اوخویوب امتیاز دا وئردیلر آنجاق اجرایی هئیت طرفیندن کنارا قویولدولار.) امتییازلار اساسیندا کنارا قویولان حکایه‌لر ایچینده 3 حکایه ایلک اون حکایه ایچه‌ری‌سینه گیره‌بیلیردیلر اما تاسفله یاریشمانین بیلدیریشینده قید اولونان قایدالار اساسیندا حذف اولوندولار؛ بو اوچ حکایه‌نین حذف اولمالاری‌نین سبب‎لری:

- تکجه بیرگون (عظیمه کریم زاده): اردبیلده "سیب" آدیندا بیر فستیوالا قاتیلیب بیرینجی یئری قازانمیشدیر (1391-جی ایلده)

- سیبئرییادا قالماق اولارمی؟ (مرتضی سلمانی) : چیراق آدلی درگی‌سی‌نین سیناق ساییندا چاپ اولونموشدور. (1389-جی ایلده)

- بیزیم تنگه (علی بخش پور) : "مین بیر گئجه" آدلی وئبلاقدا یاییملانمیشدیر.


یازار

حئکایه‌نین آدی

کد

عباس نعیمی

سازسیز، سؤزسوز

01

ایرج محسنی

آجي گولوش             

02

 

داور زمانخانی

سَحَر ، سَحَره قده ر ياتمادي !؟

03

 

معصوم جبارپور

بو گئجه بوتون گوزگولره قان جالانير...

04

 

کریم چایچی

قیز قوش قووان

05

 

مسعود سبزی

ائرکک دونیا

06

 

احد فرهمندی

قورخاق كيشي

07

 

ائلشن پورحسن

اعلانلار

08

 

حسین اقبالیان

بنووشه اؤلومو

09

****

چيلپاق سؤيود آغاجلاري

10

 

محمد رزاقی

بير گونده ياشاديق

11

 

رسول ملکزاده

قارین قولو خان جماعتی

12

رقیه وعیدی

يانقين

13

 

افراسیاب نورالهی

قارانقوش اوشاق

14

 

حسن رفیعی

ملكاميت

15

شریف مردی

قیز

16

****

گلدي-گئدر

17

 

****

ساری

18

 

خسرو باریشان

نورماللارين نورمالي

19

 

امیر نصیری

یولداش لار، اونودولمایاجاق دیر

20

 

نازخند صبحی

سویوق گئجه

21

 

میلاد باقری

رسولونان داوودون ناغیلی

22

 

علی قاسمی

میلچک

23

 

علی اصغر اوجاقلو

آسی‌لی

24

 

حسین واحدی

دووارلار مه‌لرکن

25

 

****

پنجره

26

 

فاطمه زلفی

بو گزینتی‌دن

27

 

احد محمدی

ساققیزلارین اوغورلادیلار

28

 

شعله مرتضی سیلاب

بیر داملا یاشام

29

 

****

اؤلوم ماهنی‌سی

30

 

عظیمه کریم زاده

تکجه بیر گون

31

 

****

ایلان ایلی

32

 

****

گؤزومو یوموب آچیرام

33

 

نسترن اکبرزاده

سونونجو شام

34

 

علی بخش پور

بیزیم تنگه

35

 

پریسا علیزاده

دؤرد دووار

36

 

****

آغاجلارین آراسیندان گلن خیشیلتی سسی

37

 

پریسا میرزایی ماهر

بیر دسته چؤل قازی  

38

 

توران قربانی صادق

قاپی

39

 

مصطفی جباری سابق

منی‌ده آپارین...

40

 

مجید اسکندری

 هیچ زادین ظاهرینه آللانما

41

 

سعید فیوضات

بخت اولدوزو

42

سارا خداکرمی

سووخا

43

 

سنبله قاسمپور

ایکی قورد کیمی

44

 

مریم احدپور

آغ چادرالی آرواد

45

 

مرتضی سلمانی

سیبئرییادا قالماق اولارمی؟

46

 

مهدی آقازاده

یاشایان لار بیر گون اؤلور

47

 

پارلا ائل سئون

دوغرو حایات

48

 

****

اؤلوم ده‌ییل کی

49

 

****

اوره‌ییمده پالتار یووان خانیم  

50

 

+   یکشنبه 1392/08/19ساعت 11:47     | 

صباحي اؤدولو ياريشماسيندا بيرينجي مرحله‌نين سونوندا داورلرين وئردييي ايمتييازلار اساسيندا ايلك اون حكايه اوزه چيخدي. ايكينجي مرحله‌ده بو ايلك اون حكايه‌دن بيريسي صباحي اؤدولونو قازاناجاقدير.

1- ساري

2- گؤزومو يوموب آچيرام

3- اؤلوم دئيل كي

4- اوره‌ييمده پالتار يووان خانيم

5- چيلپاق سؤيود آغاج‌لاري

6- اؤلوم ماهني‌سي

7- آغاج‌لارين آراسيندان گلن خيشيلتي سسي

8- ايلان ايلي

9- پنجره

10- گلدي-گئدر

+   چهارشنبه 1392/08/15ساعت 12:15     | 

--------------------------------------------
سازسیز، سؤزسوز
--------------------------------------------
آجي گولوش 
--------------------------------------------
سَحَر ، سَحَره قده ر ياتمادي !؟
--------------------------------------------
بو گئجه بوتون گوزگولره قان جالانير...
--------------------------------------------
قیز قوش قووان
--------------------------------------------
ائرکک دونیا
--------------------------------------------
قورخاق كيشي
--------------------------------------------
اعلانلار
--------------------------------------------
بنووشه اؤلومو
--------------------------------------------
چيلپاق سؤيود آغاجلاري
--------------------------------------------
بير گونده ياشاديق 
--------------------------------------------
قارین قولو خان جماعتی
--------------------------------------------
يانقين
--------------------------------------------
قارانقوش اوشاق
--------------------------------------------
ملكاميت
--------------------------------------------
قیز
--------------------------------------------
گلدي-گئدر
--------------------------------------------
ساری
--------------------------------------------
نورماللارين نورمالي
--------------------------------------------
یولداش لار، اونودولمایاجاق دیر
--------------------------------------------
سویوق گئجه
--------------------------------------------
رسولونان داوودون ناغیلی
--------------------------------------------
میلچک
--------------------------------------------
آسی‌لی
--------------------------------------------
دووارلار مه‌لرکن
--------------------------------------------
پنجره
--------------------------------------------
بو گزینتی‌دن
--------------------------------------------
ساققیزلارین اوغورلادیلار
--------------------------------------------
بیر داملا یاشام
--------------------------------------------
اؤلوم ماهنی‌سی
--------------------------------------------
تکجه بیر گون
--------------------------------------------
ایلان ایلی
--------------------------------------------
گؤزومو یوموب آچیرام
--------------------------------------------
سونونجو شام
--------------------------------------------
بیزیم تنگه
--------------------------------------------
دؤرد دووار
--------------------------------------------
آغاجلارین آراسیندان گلن خیشیلتی سسی
--------------------------------------------
بیر دسته چؤل قازی 
 --------------------------------------------
قاپی
--------------------------------------------
منی‌ده آپارین...
--------------------------------------------
 هیچ زادین ظاهرینه آللانما
--------------------------------------------
بخت اولدوزو
--------------------------------------------
سووخا
--------------------------------------------
ایکی قورد کیمی
--------------------------------------------
آغ چادرالی آرواد
--------------------------------------------
سیبئرییادا قالماق اولارمی؟
--------------------------------------------
یاشایان لار بیر گون اؤلور
--------------------------------------------
دوغرو حایات 
--------------------------------------------
اؤلوم ده‌ییل کی
--------------------------------------------
اوره‌ییمده پالتار یووان خانیم   
--------------------------------------------
+   یکشنبه 1392/08/05ساعت 21:26     | 

و ایل (۲۰۱۳) ادبیات اوزره نوبل موکافاتینی ۸۲ یاشلی کانادالی یازیچی خانیم “آلیس مونرو” قازاندی. آلیس مونرو بو موکافاتی قازانان ۱۳ینجی قادین یازیچی‌دیر. اوندان اؤنجه آلمان یازیچیسی “هرتا مولر” ۲۰۰۹ینجی ایل بو موکافاتا لاییق گؤرونموشدور.نوبل ادبیات موکافاتینی وئرن ایسوئچ(سوئد) آکادئمیاسی بو موناسیبتله یایدیغی معلوماتدا آلیس مونرونو “مودئرن قیسا حیکایه‌لر اوستادی” کیمی تقدیم ائتمیش و اونو “معاصر قیسا حیکایه ژانرینداکی اوستالیغینا گؤره” بو مکافاتا لاییق گؤرموشدور.آلیس مونرو “کانادانین چئخوفی” کیمی تانینیر. ایندییه‌دک ۱۳ حیکایه کیتابی و بیر رومانی یاییلیبدیر.  حیکایه‌لرینده کانادانین کیچیک کندلرینده یاشایان اینسانلارین حیاتلاریندان بحث ائدن “مونرو” سئوگی و اؤلوم کیمی موضوعلاری اؤن پیلانا چیخاریبدیر. اونون حیکایه‌لری‌نین آنا خطینی قادین‌ موضوعسو: آنا- قیز، قیز- آنا- نوه، آتا- قیز موناسیبتلری تشکیل ائدیر.آلیس مونرودان فارس دیلینده  «فرار»، «رویای مادرم»، «دورنمای کاسل‌راک» و «دست‌مایه‌ها» عنوانلاری آلتیندا حیکایه‌لر مجموعه‌سی چاپ ائدیلمیشدیر.

قايناق: ايشيق

+   شنبه 1392/07/20ساعت 13:43     | 

مهر آيي‌نين 15-جي گونونده خانيم كبيري‌نين "ائويم" رومانينا گؤره، "آراز" درنه‌يي طرفيندان بير نقد جلسه‌سي كئچيريلدي. زهره محمدپور، نادر ازهري، مجيد راستي، داود دوستدار، محمد سليمي، جعفر بزرگ امين، رئيس نيا، حامد احمدي و عليرضا ذيحق جلسه‌ده چيخيش ائديب رومانا گؤره باخيش‌لاريني بيلديرديلر. بو باره اليميزه چاتان يازيلي نقدلرين لينكي‌ني ائله بوردا پايلاشاجاييق:

1- اعجازا ياخين بير اتفاق - عليرضا ذيحق

2- رومان وارليغي دئشه‌لمك دئمك‌دير-ائويم روماني تنقيد آخاريندا-جعفر بزرگ امين

+   شنبه 1392/07/20ساعت 7:37     | 

یاریشمایا گؤنده‌ریلن اثرلر ایچه‌ری‌سینده بیر سیراسی اؤنجه‌دن بعض درگی‌لرده یا وئبلاق‌لاردا یاییلیبلار. نئچه‌سی داه ائله بیل باشقا یاریشمالاردا قاتیلان اثرلردن‌دیرلر. اجرایی هئیتی اولاراق بو اثرلری تاسفله سیرادان چیخارتماق مجبورییتینده‌ییک!!! بو اثرلرین لیستینی یاخیندا اعلان ائده‌جه‌ییک

+   جمعه 1392/07/19ساعت 20:36     | 

بيزدن اولان بير سيرا سورغولار "صباحي" ياريشماسي‌نين داورليغي باره‌سينده‌دير. بير قيسا ايضاحات بو باره‌ده آرتديرماليييق:

1-        داورلیق ایکی مرحله‌لی اولاجاق‌دیر و هر داور بیرینجی مرحله‌ده 10-1 قدر هر بیر حکایه‌یه ایمتییاز وئره‌جک. ایمتییازلار بير جدوله دولدورولوب اجرایی گروها یوللاناجاق. (حكايه‌لره كد وئريليب و داورلر حكايه‌لرين ايمتييازلاريني كد اساسيندا جدوله دولدوراجاقلار) 

2-        اجرایی گروه هر حکایه اوچون آلتی داورین وئردییی ایمتییازلاری توپلاییب، بو توپلانمیش ایمتییازلار اساسیندا حکایه‌لری ان چوخ ایمتییاز قازانان حکایه‌دن ان آز ایمتییاز قازانانا قدر سیرالییاجاق. ایلک اون حکایه ایکینجی مرحله‌یه کئچه‌جکلر. بو اون حکایه‌لرین کدلاری داورلره اعلان اولونوجاق.

3-       ایکینجی مرحله‌ده داورلر 100-1 قدر بو اون حکایه‌نین هر بیری‌سینه ایمتییاز وئره‌جکلر. آلتی داورین وئردییی ایمتییازلارین جمعی اساسیندا بیرینجی حکایه (صباحی اؤدولونو قازانان) اوزه چیخاجاق.

+   یکشنبه 1392/07/07ساعت 8:16     | 

بیلدییینیز کیمی "صباحی اؤیکو اؤدولو" یاریشماسی دؤرد آی اؤنجه ایلک بیلدیریشینی یایارکن باشلاندی. بو یاریشمانین اثر گؤندرمه مؤهلتی ده ایکی گون اؤنجه قورتاریب داورلیق سوره‎سینه کئچدی. 50 یازاردان بیزه 50 اثر یوللاندی. بیزده بو اثرلری داورلریمیزه تاپشیریب اونلارین نظرلرینی گؤزله‌ییریک. صباحی یاریشماسیندا ایکی مرحله داورلیق اولاجاقدی. بیرینجی مرحله‎ده ایلک اون حئکایه سئچیلیب سونرا اون حئکایه ایچیندن بیرینجی حئکایه یا همان صباحی اؤیکو اودولونو قازانان اوزه چیخاجاقدیر. داورلیق باره‌سینده گلجکده اطرافلی معلومات وئره‌جه‌ییک. هله‎لیک بیزه گلن حئکایه‌لر باره‌سینده قیسا بیر معلوماتی بوردا قئید ائدیریک:

حئکایه‌لرین سایی: 50

- خانيم يازار: 16

- آقا يازار: 34

یازارلارین یاشادیغی شهرلر:

12 حئکایه: اردبیل

10 حئکایه: زنگان

9 حئکایه: تبریز

2 حئکایه: ماراغا، خیوو، تهران

1 حئکایه: ساراب، ملیک کندی، قوم، کویو، اورمو، قوشاچای، خوی، سالماس، زرین آباد، خودافرین، آذرشهر


یازارلارین یاشادیغی اوستان‎لار:

شرقی آذربایجان: 15 حئکایه

اردبیل: 15 حئکایه

زنگان: 11 حئکایه

غربی آذربایجان: 4 حئکایه

باشقا اوستان‌لار: 3 حئکایه


(ایضاح: 2 یازار یاشادیغی شهر و اوستانی‌نين آدینی بیزه یوللامامیشدی.)

+   سه شنبه 1392/07/02ساعت 21:41     | 

اؤنجه كي مطلب لر